pasiaw bahin sa gugma

Mag-istorya kita'g kabahin sa gugma,
Mga nagkalain-laing bansilag, hisgutan ta,
Iapil sad nato ang mga makalingaw nga kaagi,
Hinaot ang akong balak makapahiyom kaninyo og makapangisi.

Ang gugma osa kini ka pagbati,
Nga bisan si kinsa man makasinati,
Sa kinailawman kini sa kasingkasing muturok,
Nga hubaron sad dayon sa maalam nga utok.

Ang mahigugma, dili ta gyud kapugngan,
Lisod kaayo magtigkombate sa dughan,
Kun ang kasingkasing na gani ang mupitik,
Lupig pa'y lastiko kun mulabtik!

May mga tawo nga miingon,
Nga ang gugma dili angayang palabyon,
Bisan pa man og nabati kini sa una lang nga panagkita,
Dili kini nagpasabot nga ang gibati tiawtiaw na.

Kasagaran sa mga tawo mutuo,
Nga ang gugma buta lage kuno,
Nga dili basehan kun unsa ang hulagway,
Ang importante nga sila naghinigugmaay.

Para sa uban, dili sukdanan ang salapi,
Sa gauros-uros nga gugmang gibati,
Bahala'g saging, basta labing,
Ay, iring! Ayaw lang kamo og ka-igking!

Sauna nauso pod ang gitawag nga"boya,"
Bisan pa og wala mahigugma mapugos nalang sila,
Unsaon, mao ma'y pagboot sa mga ginikanan,
Walay laing mabuhat kundi ang mutuman nalang.

Naa gani kuno'y mga tawo nga manglumay,
Maangkon lang ang gugma ni inday,
Inig pangulitawhan, dili gyod kini kabalibad,
Lipay si undoy kun ang giyamyam mutalab!

Pipila sa akong mga kaila miasoy,
Nga kini kunong mahigugma haskang pagkakapoy,
Labi na kun kada-adlaw na lang mag-away,
Magsige og lalis kay dili lage magkasinabtanay!

Usahay sad, mahigugma lang ka sa osa ka tawo,
Unya diay to, wala siya'y ikasukli sa gugma nimo,
Dili lalim ang kasakit sa dughan nga bation,
Mura og dukdukon, mura og tusok-tusokon.

Apan unsaon man nang gugma nga babagan,
Bisan unsaon, sa mga ginikanan dili man sugtan?
Bisan unsaon pa og luhod-luhod og hinangyo,
Maniguwang nalang, dili pa maminyo!

Sa mga nagkadayon nga pares, matod pa nila,
Nga nindot gyod kaayo ang bation kun mahigugma,
Hilabina kun naa sa imong mga kiliran,
Ang binuhat nga higugmaon mo hangtod sa kahangturan.

Gugma, gugma, gamhanan gayud ka,
Sa katawhan, ikaw makapahilak og makapakatawa,
Usa ra gyuy akong hangyo kanimo,
Nga magpabilin kang pirmi sa kasingkasing sa mga tawo...